Претседателот на Владата, Христијан Мицкоски, изјави дека целта на предложените измени на Изборниот законик е да се обезбеди поголема излезност на македонската дијаспора и да се зајакне нејзината поврзаност со државата.
Во интервју за телевизија Сител, Мицкоски оцени дека СДСМ и Левица се против предложените измени бидејќи, како што рече, се свесни дека ќе ги загубат следните избори.
„Суштината е да обезбедиме поголема излезност на дијаспората и поголема комуникација меѓу татковината и дијаспората. Целта ни е тие луѓе да се чувствуваат дека учествуваат во политиките на својата држава“, изјави Мицкоски.
Тој додаде дека Владата е подготвена веднаш да започне разговори за сите можни решенија што ќе овозможат полесно гласање на иселениците, вклучително и електронско гласање или гласање по пошта.
„Да најдеме начин како да ја зголемиме излезноста на дијаспората. Не е важно дали тоа ќе биде електронско или со писма, важно е да им овозможиме на луѓето полесно да го остварат своето право на глас“, рече премиерот.
Според Мицкоски, новиот Изборен законик треба да ги содржи препораките на ОБСЕ и ОДИХР и да придонесе за поголема излезност на идните изборни процеси.
