Премиерот Христијан Мицкоски на денешната собраниска седница одговори на пратеничко прашање од лидерот на СДСМ, Венко Филипче, при што ги спореди економските показатели од периодот на владата на СДСМ и ДУИ со актуелните резултати. Тој истакна дека инфлацијата е значително намалена, додека растот на платите, пензиите и бруто домашниот производ е побрз отколку во претходниот владин мандат.
Мицкоски посочи дека инфлацијата во јуни 2026 година изнесувала 3,4 проценти, додека во истиот месец во 2022 година достигнувала 14,7 проценти.
„Во јуни 2022 година Македонија беше осма по висина на инфлацијата меѓу 12 држави во регионот, а денес ја делиме третата позиција со Албанија со инфлација од 3,4 проценти. Тоа се факти“, рече премиерот.
Осврнувајќи се на унгарскиот заем, тој нагласи дека државата обезбедила финансиски средства под најповолни услови.
„Половина од средствата беа искористени за отплата на еврообврзница од 500 милиони евра. Дел од преостанатите средства се пласирани како субвенционирани кредити за компаниите со каматна стапка од 1,95 проценти, а останатите се насочени кон реализација на инфраструктурни проекти во општините, вклучително и во оние каде што градоначалници има СДСМ“, истакна Мицкоски.
Тој додаде дека цените на горивата во Македонија се најниски во регионот, нагласувајќи дека станува збор за производ чија цена се формира на берзите.
Во своето обраќање, премиерот упати критики и кон Филипче, потсетувајќи на периодот на пандемијата со ковид-19.
„Во времето кога бевте министер за здравство, Македонија беше меѓу земјите со најголем број починати од коронавирусот, а јавноста беше сведок и на неуспешниот обид за набавка на вакцини преку компанијата „Стабри“ од Хонг Конг. Очекувам Обвинителството да го испита тој случај“, рече Мицкоски.
Премиерот презентираше и споредбени податоци за растот на платите, наведувајќи дека во периодот од јули 2017 до мај 2024 година, за време на владата на СДСМ и ДУИ, просечната нето-плата месечно растела за околу 224 денари. Според него, во периодот од јули 2024 до мај 2026 година, просечното месечно зголемување на нето-платата изнесува 373 денари.
Мицкоски направи споредба и кај пензиите, посочувајќи дека за речиси две години од мандатот на актуелната Влада просечната пензија е зголемена за повеќе од 7.000 денари, што, според него, е повеќе отколку во претходните седум години.
Тој се осврна и на бруто домашниот производ, наведувајќи дека растот на економијата во изминатите две години е поголем во однос на растот во шестгодишниот период на претходната власт.
„Ова се бројки и показатели кои јасно ја покажуваат разликата меѓу двете влади“, порача Мицкоски.
