Мицкоски до опозицијата: Седнете и договорете се, бланко ќе го поддржиме секој предлог во којшто ќе биде вклучено гласањето на дијаспората

Премиерот Христијан Мицкоски ја повика опозицијата да постигне заеднички став за измените на Изборниот законик, порачувајќи дека владејачкото мнозинство безусловно ќе го поддржи секој предлог што ќе го содржи решението за гласање на македонската дијаспора.

— реклама —

Одговарајќи на новинарско прашање, Мицкоски рече дека Изборниот законик е една од десетте реформи што треба да бидат завршени до средината на јули во рамки на европските обврски на државата.

Тој оцени дека сегашниот начин на гласање на иселениците не овозможува тие во доволен број да го остварат своето избирачко право, особено оние што живеат во прекуокеанските земји како Австралија и Канада.

— реклама —

Мицкоски посочи дека Владата веќе подготвила предлог што ги содржи препораките на ОБСЕ и ОДИХР, но, според него, не добил поддршка од опозициските партии.

— реклама —

„Седнете, договорете се во опозицијата што сакате, како сакате, дајте предлог во којшто ќе биде вклучено гласањето на дијаспората и ние бланко ќе го поддржиме. Само да го завршиме ова до 15 јули за да можеме успешно да ги завршиме десетте чекори и да преминеме во следната фаза“, изјави Мицкоски.

Тој додаде дека владејачкото мнозинство има усогласен став и е подготвено да ги прифати барањата на опозицијата, доколку тие достават заеднички предлог што ќе го регулира и гласањето на дијаспората.

— реклама —

Воедно, премиерот ја критикуваше опозицијата, оценувајќи дека сè уште нема постигнато заеднички став околу измените на Изборниот законик и дека поради тоа процесот останува блокиран.