Премиерот Христијан Мицкоски на денешната прес-конференција ги обвини СДСМ и Левица дека со поднесување на 13.000 амандмани го блокираат донесувањето на новиот Изборен законик, со цел, како што рече, да го спречат електронското гласање на македонската дијаспора.
Одговарајќи на новинарско прашање, Мицкоски изјави дека СДСМ, според него, најпрво придонела голем број граѓани да ја напуштат државата, а сега им го ускратува правото полесно да учествуваат во изборниот процес.
„СДСМ, кога беше на власт, со својата катастрофална политика мотивираше голем број наши граѓани да ја напуштат државата, а сега по вторпат ги казнува, не дозволувајќи им да гласаат по електронски пат“, рече Мицкоски.
Тој додаде дека текстот на Изборниот законик бил усогласуван со месеци меѓу парламентарните партии, но, според него, Левица во последен момент одбила да го потпише предлогот и покрај тоа што, како што тврди, биле прифатени сите нивни барања.
Мицкоски изјави дека Владата била подготвена да прифати дополнителни измени во делот на изборната постапка и поднесувањето жалби, но нагласи дека нема да отстапи од предлогот за електронско гласање на дијаспората.
„Нашата црвена линија е гласањето на дијаспората, бидејќи таа мора да се чувствува поврзана со својата татковина. Нашата цел е еден ден тие луѓе повторно да се вратат дома“, истакна премиерот.
Тој посочи и дека воведувањето електронско гласање би значело намалување на трошоците за организирање избори во странство, бидејќи, како што рече, државата во моментов троши милиони евра за спроведување на изборниот процес во дипломатско-конзуларните претставништва.
На крајот, Мицкоски ги повика СДСМ и Левица да ги повлечат амандманите и да овозможат донесување на Изборниот законик, оценувајќи дека националниот интерес треба да биде пред партиските пресметки.
