Премиерот Христијан Мицкоски на денешната прес-конференција оцени дека Македонија годинава најуспешно се справува со пожарите, споредувајќи ја состојбата во земјава со големите огнени стихии што ја зафатија Европа и регионот.
При посетата на Прилеп, Мицкоски посочи дека клучен фактор е навремената подготовка на опремата и дополнителниот ангажман на институциите и граѓаните.
Тој нагласи дека трите воздухоплови „ер трактори“ годинава биле целосно ремонтирани и ставени во функција уште во мај.
„Во 2024 година, во јуни, сите три воздухоплови, или познати во јавноста како „ер трактори“, беа приземјени без да биде направен соодветен ремонт на време. Оваа година ремонтот на овие три воздухоплови беше направен и завршен и тие беа на писта во мај“, рече Мицкоски.
Премиерот потсети и на пренамената на дел од воените возила во противпожарни возила. Во соработка со Министерството за одбрана, Министерството за внатрешни работи, Дирекцијата за заштита и спасување и Центарот за управување со кризи, возила од типот „пинцгауери“, „хермелини“ и други биле опремени со резервоари за вода.
Според Мицкоски, седум вакви возила биле ангажирани во изминатите денови во справувањето со пожарите во Прилеп и прилепскиот регион.
Дополнително, годинава во рамките на Дирекцијата за заштита и спасување биле ангажирани 300 доброволци со договори на определено време, што, според премиерот, досега не било реализирано на ваков начин.
„Ако оваа година се спореди со она што се случуваше во Европа, пожарите коишто беа во Франција, во Шпанија, во соседна Грција, Хрватска, Црна Гора, Турција, соседна Србија, сметам дека ние како држава се справивме најдобро досега“, потенцираше Мицкоски.
