СДСМ преку соопштение обвини дека ВМРО-ДПМНЕ и премиерот Христијан Мицкоски не се откажуваат од, како што велат, намерата за изборен инженеринг преку гласањето на дијаспората.
Од партијата тврдат дека, по неуспешниот обид да се воведе електронско гласање, сега власта предлага гласање по пошта, но без доволни механизми за контрола и гаранции за заштита на изборниот процес.
„На Мицкоски не му е важна реформската агенда, туку таа служи како параван за изборен грабеж“, наведуваат од СДСМ.
Во партиското соопштение се истакнува дека СДСМ не е против правото на глас на македонските иселеници, нагласувајќи дека тие и сега учествуваат на изборите, но се против модел кој, според нив, остава простор за манипулации со гласовите.
Од СДСМ додаваат дека власта одбива Државната изборна комисија со консензус да ги уреди процедурите за гласање на дијаспората и прашуваат зошто не се прифаќаат механизми што би обезбедиле поголема доверба во изборниот процес.
Партијата порача дека нема да поддржи, како што наведува, „изборен грабеж“ и ја повика власта да се откаже од предложените решенија и да подготви нов предлог во кој правилата за гласање на дијаспората ќе бидат регулирани од ДИК со консензус.
