Премиерот Христијан Мицкоски изјави дека Институтот за јавно здравје денес претставува пример за успешна трансформација, нагласувајќи дека од институција која се соочувала со финансиски проблеми прераснала во установа што инвестира во опрема, инфраструктура и унапредување на јавното здравје.
На настан посветен на новите активности и проекти на Институтот, Мицкоски истакна дека во минатото институцијата била предмет на бројни ревизорски забелешки и, како што рече, не ја извршувала својата основна функција – грижата за јавното здравје.
„Денес имаме институција која инвестира во опрема, во реновирање на инфраструктурата и генерално се грижи за јавното здравје, за разлика од минатото кога, според ревизорските извештаи, служела за сè друго освен за она за што била формирана“, изјави премиерот.
Тој упати благодарност до директорката на Институтот, посочувајќи дека со својата работа придонесува за позитивни промени и резултати во функционирањето на установата. Благодарност упати и до Министерството за здравство и Фондот за здравствено осигурување за поддршката што ја обезбедуваат за развојот на институцијата.
Мицкоски посебно ги истакна вработените во Институтот за јавно здравје, оценувајќи дека токму тие се најзаслужни за постигнатите резултати.
„Најголема благодарност до сите вработени кои секојдневно работат и се трудат да постигнат резултати повеќе. Тие се вистинските херои на оваа институција“, рече премиерот.
Тој изрази надеж дека во иднина ќе има уште повеќе поводи за промоција на проекти и инвестиции во здравствениот сектор, со кои, како што посочи, ќе се исправат пропустите од минатото и ќе се подобруваат услугите за граѓаните.
