„Мицкоски избега од пуштањето вода во Гостивар – истиот ден водата забранета во Демир Капија“, вели СДСМ

СДСМ преку соопштение го критикува начинот на кој Владата се справува со проблемите со квалитетот на водата за пиење, посочувајќи дека истиот ден кога беше соопштено оти водата во Гостивар е безбедна за пиење, од Демир Капија стигнало предупредување за неисправност на водата.

Од партијата велат дека Јавното комунално претпријатие „Бошава“ од Демир Капија објавило дека водата од нивниот водовод не е безбедна ниту за пиење, ниту за готвење.

— реклама —

СДСМ го обвинува премиерот Христијан Мицкоски и министерот за здравство за отсуство за време на кризата во Гостивар, посочувајќи дека вчера пред камерите вода пиеле други претставници на институциите.

„Вчера во Гостивар организираа здравица и групна фотографија со чаши вода. Срамота. Премиерот и министерот за здравство не беа таму. Од екскурзија „пуштаа“ вода“, наведуваат од СДСМ.

— реклама —

Од опозициската партија тврдат дека Мицкоски ниту еднаш не се појавил во Гостивар откако започна кризата со водата и епидемиолошката состојба во градот.

— реклама —

СДСМ дополнително обвинува дека проблемите со квалитетот на водата не се ограничени само на Гостивар и Демир Капија. Од партијата тврдат дека во повеќе од 50 градови нема редовни и јавно достапни анализи на водата, како и дека постојат сомневања за неисправност и загадување на четири реки.

„Наместо официјални извештаи, лабораториски анализи и редовни контроли на квалитетот на водата, ние имаме луѓе кои пијат вода од чешма и врз основа на тоа тврдат дека водата е чиста и безбедна. Од кога тоа е метод за проверка на исправноста на водата?“, прашуваат од СДСМ.

Од партијата бараат одговорност од надлежните институции и официјални докази за исправноста на водата, наместо, како што велат, уверувања пред камерите.

„Граѓаните бараат одговорност. Не здравици“, порачуваат од СДСМ.