Мицкоски: Изборниот законик останува единственото отворено прашање од реформската агенда, на потег е опозицијата

Премиерот Христијан Мицкоски изјави дека Изборниот законик останува единственото нерешено прашање од реформската агенда, додека сите останати обврски, како што рече, се реализирани или се во редовна постапка.

Одговарајќи на новинарско прашање дали по летните одмори ќе има нови разговори за измените на Изборниот законик, Мицкоски рече дека Владата продолжува со исполнување на реформските чекори.

— реклама —

„Од тие што беа во грејс-период, само Изборниот законик. Другото е сè завршено. И оние што се во редовна процедура, во најголем дел се завршени. Денеска имавме состанок преку онлајн врска со Брисел, со господинот Копман. Разговараме за законите и реформските чекори кои треба да се испорачаат до декември оваа година. Продолжуваме со несмалена динамика да испорачуваме“, изјави Мицкоски.

Тој додаде дека, според него, Македонија добила позитивни оценки за досегашната динамика на реформите.

— реклама —

„Добивме, условно кажано, и одреден комплимент дека сме први од сите земји кои веќе започнуваат со овие чекори да се занимаваат, додека другите сè уште немаат таква намера“, рече премиерот.

— реклама —

На дополнително прашање дали ќе има нови обиди за договор за Изборниот законик, Мицкоски одговори дека тоа зависи од опозициските партии.

„Тоа веќе не зависи од нас. Ние рековме нека седнат во опозицијата, нека се договорат, нека ја вклучат дијаспората, нека дојдат и ние бланко ќе го поддржиме тоа што тие меѓу себе ќе го договорат“, изјави тој.

Премиерот ги повика СДСМ, Левица, ДУИ и останатите парламентарни партии да постигнат заеднички став.

„Апелирам до претседателите на СДСМ, Левица, Демократската унија за интеграција и останатите формални или неформални групи во Парламентот да седнат, да се договорат и да ни донесат документ којшто ние веднаш ќе го прифатиме. Треба зрело да се однесуваат и да не го блокираат ова, туку како коалициски партнери да се договорат каков текст на Изборен законик ним им одговара, а ние тој ќе го прифатиме“, рече Мицкоски.