Премиерот Христијан Мицкоски на денешната прес-конференција изјави дека здравството е еден од главните приоритети на Владата и најави продолжување на инвестициите за модернизација на здравствениот систем.
Тој посочи дека за здравството годинава се издвоени рекордни повеќе од една милијарда евра, нагласувајќи дека обновата на системот е процес што бара време, финансиски средства и континуирана работа.
„Тоа што со години, па и со децении се уништувало, не може да се исправи преку ноќ. Ќе направиме сè што е во наша моќ за да обезбедиме подобри здравствени услуги за граѓаните“, рече Мицкоски.
Премиерот, кој денеска ја посети Клиничката болница во Битола, го поздрави досегашниот ангажман на раководството и вработените, оценувајќи дека реализираните активности се само почеток на поширок процес на модернизација.
Според него, Владата ќе продолжи со обновување на здравствените установи, набавка на нова медицинска опрема и зајакнување на човечките капацитети.
„Нè очекуваат уште поголеми предизвици, но остануваме цврсто ориентирани да изградиме современо здравство што ќе одговори на потребите на граѓаните“, истакна Мицкоски.
Тој им се заблагодари на здравствените работници, на Министерството за здравство и на Фондот за здравствено осигурување за досегашната соработка и трпението, додавајќи дека инвестициите во здравствениот сектор ќе продолжат и во наредниот период.
