Премиерот Христијан Мицкоски денеска упати честитка по повод одбележувањето на Денот на албанската азбука, истакнувајќи ја историската важност на овој датум и неговата улога во градењето на заедничкото општество во Македонија.
Во својата порака, Мицкоски потсети дека 22 ноември е ден со длабока културна и историска симболика, поврзан со Битола и со Конгресот од 1908 година, кога албанската интелигенција го утврдила единствениот стандарден албански алфабет.
„Тоа беше чин со длабоко европско значење – чин на модернизација, образование и отвореност,“ рече Мицкоски, нагласувајќи дека Битолскиот конгрес покажал како силата на едно општество произлегува од знаењето и од вербата во иднината.
Тој подвлече дека Денот на албанската азбука е значаен и за Македонија, земја што ја дефинира како „дом на различности што ја збогатуваат заедничката национална приказна“.
„Албанската заедница со својата култура, јазик и традиции е суштински дел од нашата држава,“ порача премиерот.
Мицкоски истакна дека Владата останува посветена на меѓуетничката доверба и на политики што создаваат простор за достоинствен развој на сите јазици и култури во државата. Најави и продолжување на проектите за инфраструктурен развој, модернизација на училиштата, поддршка на културните институции и дигитализација на јавните услуги.
„Нашата цел е секој граѓанин, во секој дел од државата, да го почувствува напредокот и да знае дека државата стои зад него. Ова не е само политичка обврска, туку морална должност кон идните генерации,“ истакна тој.
Во завршницата од обраќањето, премиерот испрати порака за единство:
„Успехот е наш заеднички проект. Само ако сме обединети во почит, доверба и одговорност, ќе можеме да ја движиме татковината напред.“
Мицкоски на граѓаните им го честиташе Денот на албанската азбука, повикувајќи на продолжување на изградбата на заедничко општество со „почит кон различностите и со јасна визија за иднината“.
