Мицкоски: Македонија останува посветена на европскиот пат и на зајакнувањето на партнерствата со европските лидери

Македонија останува посветена на европската интеграција и на зајакнувањето на партнерствата со европските лидери, порача премиерот Христијан Мицкоски по денешниот самит, на кој, како што оцени, биле испратени силни пораки за европската иднина на Западен Балкан.

— реклама —

Мицкоски посочи дека канцеларите Мерц и Штокер, како и другите учесници на работниот дел од состанокот, ја потврдиле определбата регионот да стане дел од Европа во блиска иднина.

Тој истакна дека Македонија веќе има усогласена надворешна и одбранбена политика со Европската Унија и дека напредува во исполнувањето на реформската агенда. Очекува постигнатото наскоро да биде вреднувано и земјата да добие можност да ги започне преговорите за членство. Според него, постепената интеграција е можност за земјите од регионот, но не смее да го замени полноправното членство во ЕУ.

— реклама —

Премиерот се осврна и на глобалните предизвици, посочувајќи ја енергетската криза, немирите во повеќе европски престолнини и војната во Украина. Тој оцени дека светот се соочува со сериозни неизвесности и пренесе дека, според информации изнесени од високи претставници на ЕУ, следните две години ќе бидат особено тешки, поради што е потребна внимателност во трошењето и одговорно управување со државата.

— реклама —

Во врска со пречките за почеток на преговорите, Мицкоски повторно ја критикуваше претходната влада на СДСМ и ДУИ за прифаќањето на условите поврзани со уставните измени. Тој нагласи дека неговата влада нема да се откаже ниту од заштитата на македонските национални интереси ниту од стратешката цел за членство во Европската Унија.

Мицкоски рече дека пред евентуална промена на Уставот треба да се постигне договор за акцискиот план за малцинствата. Според него, 26 земји-членки немаат забелешки на документот, додека една земја-членка има проблем. Затоа, како што истакна, потребно е со неа да се усогласат решенија што ќе бидат прифатливи за сите 27 членки, по што би се разговарало за следните чекори во преговарачкиот процес.

Тој ги отфрли критиките од опозицијата дека актуелната влада е одговорна за застојот во европската интеграција, наведувајќи дека наследила сериозни проблеми од претходната власт и дека нивното надминување бара време. Сепак, порача дека владата ќе продолжи да работи на остварување на своите цели и оцени дека Македонија денес е подобро место за живеење отколку пред три години, и покрај светската криза.