Премиерот Христијан Мицкоски на денешната прес-конференција изјави дека Македонија во јуни ја имала најниската инфлација во регионот и дека Владата располага со план и доволно резерви за справување со можни нови економски предизвици.
Одговарајќи на новинарско прашање, Мицкоски рече дека глобалната состојба останува неизвесна поради војните во Украина и на Блискиот Исток, што директно влијае врз енергетските пазари и снабдувањето.
Тој нагласи дека Владата успева навремено да обезбеди енергенси и гориво, посочувајќи дека, според него, ниските цени на горивата во земјава привлекуваат и граѓани од соседните држави да полнат гориво во Македонија.
„Во јуни успеавме да имаме најниско ниво на инфлација споредено со сите држави во регионот. Особено ме радува што кај храната таа е околу 2,5 проценти, а кај облеката и обувките околу 2,1 процент. До вкупната инфлација од 3,4 проценти најмногу придонесуваат тутунот, тутунските производи, алкохолот и транспортните услуги поради повисоките цени на горивата“, изјави Мицкоски.
Премиерот изрази надеж дека тензиите во Заливот ќе се смират, што, како што рече, ќе овозможи попредвидливо економско планирање, но нагласи дека и во случај кризата да продолжи, институциите имаат подготвен план.
„И да продолжи кризата, ние имаме план и доволно резерви како да одговориме на овој предизвик“, рече Мицкоски.
Во својата изјава тој ја обвини опозицијата дека со години шири негативни прогнози за економската состојба во државата, додавајќи дека, според него, најавите за банкрот и други кризни сценарија не се оствариле.
Мицкоски порача дека Владата ќе остане фокусирана на реализација на своите цели и справување со економските предизвици, со цел да обезбеди стабилност и сигурност за граѓаните и стопанството.
