Премиерот Христијан Мицкоски не очекува значително поскапување на горивата во земјава, оценувајќи дека евентуалните промени во цените ќе бидат минимални.
Одговарајќи на новинарско прашање дали следува нов бран поскапувања на нафтените деривати, Мицкоски изјави дека според владините пресметки не се очекуваат поголеми ценовни промени.
„Не очекувам некое поголемо поместување, отприлика околу половина денар, односно околу 50 дени, да има нивелирање на цените на безоловниот бензин и дизелот, со што повторно остануваме убедливо најевтината земја кога станува збор за цените на горивата“, рече премиерот.
Тој повтори дека Македонија е единствената земја во регионот каде дизел горивото е поевтино од безоловниот бензин и најави дека во иднина ќе мора да се размислува за измени во акцизната политика.
Според Мицкоски, по стабилизирањето на состојбите и смирувањето на кризата, можно е да се пристапи кон нивелирање на акцизите, при што кај едни горива тие би се намалиле, а кај други би се зголемиле.
„Такво е искуството и примерот кај сите соседни земји. Никаде немаме толку драматично поевтин дизел во однос на безоловниот бензин. Речиси секаде дизелот е поскап, и тоа значително поскап од бензинот“, истакна Мицкоски.
Тој додаде дека по воспоставувањето на очекуваниот мир и стабилизацијата на состојбите ќе може посериозно да се разговара за можните измени во акцизната политика.
