Мицкоски: На сите оние кои денеска го прославуваат Рождеството Христово - Божиќ, им го честитам празникот со искрени желби за благосостојба, духовен мир и добро здравје

Претседателот на Владата и лидер на ВМРО-ДПМНЕ, Христијан Мицкоски, упати божиќна честитка до сите граѓани кои го прославуваат Рождеството Христово – Божиќ според грегоријанскиот календар.

— реклама —

Во своето обраќање, Мицкоски им посака на граѓаните благосостојба, духовен мир и добро здравје, посочувајќи дека божиќните празници се време кога домовите треба да бидат исполнети со радост, љубов и Божји благослов.

Тој истакна дека раѓањето на Спасителот е симбол на надеж, единство и топлина, особено во периоди кога, како што нагласи, е неопходна заедничка сила и поддршка. Мицкоски повика на солидарност и подадена рака кон сите на кои им е потребна помош, без разлика на разликите, со посебен акцент на најранливите категории граѓани.

— реклама —

„Божиќ е празник на дарувањето, љубовта и разбирањето, а нашата историја нè научила дека заедно сме посилни и дека само обединети можеме да ги надминеме предизвиците“, порача Мицкоски.

— реклама —

Во духот на божиќната порака за мир и добра волја меѓу луѓето, тој изрази желба за напредок, стабилност и перспектива на државата, нагласувајќи дека Македонија може да биде силна и успешна само доколку постои заедништво и меѓусебна почит.

Мицкоски додаде дека должност на сегашната генерација е, со посветена работа и вера, да се избори за подобар живот и посветла иднина за сегашните и идните поколенија, преку изградба на стабилна, економски силна и праведна држава.

„Нека Божиќната светлина ги осветли нашите заеднички цели кон подобро утре“, порача Мицкоски, посакувајќи им на граѓаните среќен и благословен Божиќ.