Случајот со Ива Михаилова стигнува до НАТО и ЕУ, Мицкоски најави разговори со меѓународните партнери

Премиерот Христијан Мицкоски најави дека деталите од истрагата и околностите под кои Ива Михаилова ја напуштила Македонија ќе бидат презентирани пред сојузниците во НАТО. Тој упати нови критики кон Бугарија, оценувајќи дека случајот може да ѝ нанесе дипломатска штета на официјална Софија.

Мицкоски порача дека Македонија нема да се откаже од напорите случајот да добие правна разрешница и одговорните да бидат изведени пред лицето на правдата.

— реклама —

За случајот се огласи и претседателот на СДСМ, Венко Филипче, кој од Брвеница ги обвини министерот за надворешни работи, Тимчо Муцунски, министерот за внатрешни работи, Панче Тошковски, и премиерот Мицкоски дека го договориле заминувањето на Михаилова од земјава.

— реклама —

„Погледнете што се случува овие денови во државата. Отиде Тимчо предавникот во Софија. Под радарот видовме што договориле. Ива Михаилова избега, ја пуштија под радарот. Панче ја пушти, границата му била ‘швајцарско сирење’. Па нели, Панче, ‘брат да ми е, ќе одговара’? Денеска никој не одговара“, изјави Филипче од Брвеница.

Во меѓувреме, Михаилова ќе остане во болницата „Пирогов“ во Софија најмалку уште една недела. Според бугарскиот весник „Бугарија денес“, таа е сместена на Одделението за неврохирургија, каде што специјалисти вршат дополнителни испитувања за да го утврдат најсоодветниот третман.

— реклама —

Информацијата за нејзината здравствена состојба ја потврдил и нејзиниот адвокат, Николај Димитров, кој изјавил дека таа и натаму е хоспитализирана.

„Ива Михаилова засега останува во болницата ‘Пирогов’ на дополнителни испитувања. Нема никаква основа Ива Михаилова да биде уапсена. Таа не е бегалец, не се крие и сите знаат дека е во ‘Пирогов’, вклучително и Министерството за внатрешни работи“, изјавил Димитров за весникот.

Михаилова е предмет на кривичен прогон од македонските власти во врска со сообраќајната несреќа на експресниот пат Кочани–Штип, во која загина 33-годишниот Бесим Дурмиши.