СДСМ преку соопштение обвини дека премиерот Христијан Мицкоски го најавил новото поскапување на горивата, но притоа не понудил никакви конкретни мерки за ублажување на последиците врз животниот стандард на граѓаните.
Од партијата посочуваат дека премиерот признал оти на пазарот постојат компании кои работат со високи маржи, но, како што велат, не ги открил нивните имиња ниту презел конкретни чекори.
Според СДСМ, секое зголемување на цените на горивата директно влијае врз транспортните трошоци, што понатаму се одразува и врз цените на храната и останатите производи, а најголемиот товар повторно го сносат граѓаните.
Од опозициската партија во соопштението наведуваат дека на едно четиричлено семејство му се потребни речиси 70.000 денари месечно за покривање на основните животни трошоци, додека инфлацијата дополнително ја намалува куповната моќ.
Во соопштението се тврди дека со ребалансот на Буџетот Владата признала дека инфлацијата ќе достигне 4,5 проценти, што, според СДСМ, значи дополнителен раст на цените на храната, сметките и другите трошоци за живот.
Од СДСМ оценуваат дека Владата не прифатила ниту еден од нивните предлози, меѓу кои минимална плата од 600 евра, замрзнување на маржите за основните прехранбени производи и мерки за поддршка на најранливите категории граѓани.
Воедно, партијата ја обвинува Владата дека во изминатите две години го зголемила јавниот долг за 2,5 милијарди евра, без, како што наведува, тие средства да бидат насочени кон подобрување на животниот стандард или реализација на капитални инвестиции. Според СДСМ, граѓаните секојдневно ги чувствуваат последиците од економските политики преку повисоките цени на горивата, храната и останатите основни производи.
