Мицкоски: Не размислуваме за поскапување на струјата, бараме начин да ја поевтиниме

Премиерот Христијан Мицкоски изјави дека Владата не размислува за зголемување на цената на електричната енергија, туку бара начин таа да се намали или да се прошири периодот во кој граѓаните ќе можат да користат евтина тарифа.

— реклама —

Тој истакна дека и покрај енергетските предизвици во Европа, Македонија во моментов располага со стабилен електроенергетски систем и доволно резерви.

„Не размислуваме за зголемување на цената на електричната енергија. Напротив, правиме план да најдеме формула како да ја намалиме или барем да ја прошириме евтината тарифа“, изјави Мицкоски.

— реклама —

Според него, акумулациите во земјава се исполнети околу 70 проценти и содржат речиси 500 гигават-часови акумулирана електрична енергија, што, како што рече, е доволно за сигурно снабдување на домаќинствата и стопанството.

— реклама —

Во меѓувреме, Регулаторната комисија за енергетика сè уште ги анализира можните измени на тарифниот систем. Претседателот на РКЕ, Ацо Ристов, изјави дека се прават симулации и анализи, а сите енергетски компании имаат рок до 30 септември да ги достават своите барања.

Конечната одлука за цената на струјата и евентуалните измени на тарифниот систем се очекува во декември, а новите цени ќе почнат да важат од 1 јануари наредната година.

Во меѓувреме, Здружението на инженери на Македонија предлага нов тарифен систем со значително повеќе часови евтина струја, особено во летниот период, оценувајќи дека има услови за негово итно воведување.