Премиерот Христијан Мицкоски изјави дека не очекува изјавите на унгарскиот премиер да се однесуваат на Македонија, нагласувајќи дека Унгарија досега повеќепати ја потврдила својата поддршка за земјите од Западен Балкан.
Мицкоски рече дека е убеден оти унгарскиот премиер Петер Маѓар не мислел на Македонија кога зборувал за одредени земји кандидати за членство во Европската Унија.
„Убеден сум дека колегата Маѓар, тоа што го кажувал, не го мисли за Балканот, бидејќи досега има неколку десетици изјави откако е избран за премиер на нашиот стратешки партнер, Унгарија, во кои вели дека поддршката за Западен Балкан, во кој географски спаѓаме и ние, е недвосмислена и искрена и дека таа никогаш не била доведена под знак прашање“, рече Мицкоски.
Во однос на прашањето за унгарскиот кредит и проверките поврзани со заемот, премиерот оцени дека станува збор за внатрешна работа на Унгарија и на нејзините институции.
„Тоа е внатрешна работа на Унгарија. Институциите, претпоставувам, на Унгарија ќе ја завршат својата работа и ќе излезат, претпоставувам, со некакво соопштение поврзано со тој заем“, посочи тој.
Мицкоски категорично отфрли дека постои причина за загриженост од македонска страна, нагласувајќи дека заемот е дел од стратешкото партнерство меѓу двете земји.
„Апсолутно не стравувам, затоа што сето тоа е дел од нашето стратешко партнерство, потврдено од двата парламента и од двете влади, а средствата се на транспарентен начин потрошени“, рече премиерот.
Тој ѝ се заблагодари на Унгарија за, како што ја оцени, силната стратешка поддршка во периодот кога Македонија се соочувала со сериозни финансиски предизвици.
