Премиерот Христијан Мицкоски ги отфрли критиките на парламентарната опозиција и на дел од невладиниот сектор во врска со реализацијата на проектот „Скопје – Европска престолнина на културата“, оценувајќи дека јавноста се дезинформира.
Одговарајќи на новинарско прашање за трошењето на средствата и за изборот на раководството на фондацијата, Мицкоски нагласи дека не станува збор за директор на јавна институција, туку за фондација формирана за спроведување на проектот.
Според него, проектот започнал пред десет години, но во изминатиот период не бил реализиран, поради што, како што рече, Владата се соочила со ризик Скопје да ја загуби титулата Европска престолнина на културата.
„Станува збор за фондација и за проект кој започнал пред десет години. За жал, ништо не беше направено, а Владата се соочи со предизвик за првпат во историјата на некој град да му биде одземена титулата Европска престолнина на културата“, изјави Мицкоски.
Тој додаде дека законското решение се подготвува во согласност со европските препораки и практики, наведувајќи дека ваков модел бил применет и во други европски градови.
Мицкоски потсети дека обврските за проектот произлегуваат од таканаречената „Бид-книга“, изработена пред неколку години, во која се утврдени програмските активности за 2027 и 2028 година.
Премиерот порача дека нема да дозволи да постои ниту најмал сомнеж за законитоста и транспарентноста на целиот процес, нагласувајќи дека Владата ќе инсистира на целосно почитување на процедурите.
