Претседателот на Владата, Христијан Мицкоски, изјави дека нема амбиција да се кандидира за претседател на државата, нагласувајќи дека негов фокус остануваат работата како премиер и следните парламентарни избори.
Во интервју за телевизија Сител, Мицкоски рече дека по завршувањето на политичката кариера планира да се врати на факултет и да им се посвети на студентите, но не прецизираше кога би се случило тоа.
„Планирам, како претседател на ВМРО-ДПМНЕ, да предводам уште една голема парламентарна победа. Би бил задоволен ако на следните избори го подобриме резултатот што го остваривме пред повеќе од две години“, изјави Мицкоски.
Тој додаде дека има уште многу работи што сака да ги реализира за граѓаните и државата, истакнувајќи дека е мотивиран да продолжи со реформите и да придонесе за подобрување на животот на граѓаните.
„Имам уште многу работи да направам и за граѓаните и за државата. Немам амбиција да бидам претседателски кандидат“, порача Мицкоски.
