Премиерот Христијан Мицкоски на денешната прес-конференција изјави дека Владата внимателно ја следи состојбата со инфлацијата и разгледува мерки кои ќе бидат во интерес на граѓаните, но засега нема да интервенира кај цените на алкохолот и тутунските производи.
Одговарајќи на новинарско прашање кога може да се очекуваат нови економски таргетирани мерки, Мицкоски посочи дека просечната инфлација во првите четири месеци е под 4,5 проценти и е меѓу најниските во регионот.
Според анализите на Владата, главните причини за мајската инфлација од 4,7 проценти на годишно ниво се транспортните услуги и алкохолот, цигарите и тутунските производи.
„Во делот на алкохолните пијалоци, тутунот и цигарите нема потреба од никакви мерки. Напротив, можеби треба и поригорозни мерки, затоа што целта ни е да го заштитиме здравјето на граѓаните“, рече премиерот.
Тој додаде дека Владата веќе разговара со транспортерите, бидејќи најголемиот дел од растот на цените во овој сектор доаѓа од авионскиот превоз и повисоките цени на керозинот.
„Тука може повторно да интервенираме во делот на даноците, но ќе почекаме да видиме што ќе се случува во текот на овој месец, па потоа ќе носиме одлуки“, изјави Мицкоски.
