По појавувањето на Симеон Михаилов во бугарските медиуми од Софија, премиерот Христијан Мицкоски на денешната прес-конференција побара од Бугарија да го испорача осудениот македонски државјанин, по кого е распишана меѓународна потерница.
Михаилов, кој во предметот „Детонатор“ е осуден на 12,5 години затвор, завчера се појавил во живо во прилози на бугарски медиуми додека протестирал пред македонската амбасада во Софија. Неговото појавување пред камерите открило дека се наоѓа во Бугарија, иако македонските власти го бараат со меѓународна потерница.
Мицкоски вели дека од бугарските власти очекува да постапат во согласност со партнерските односи меѓу двете земји.
„Ние имаме потерница за тоа лице и очекувам нашите партнери да постапат соодветно на партнерството. Ние сме партнери со источниот сосед во рамките на НАТО. Очекуваме луѓето кои се бараат со потерница, кои направиле некакво кривично дело, да ги испорачаат, во духот на партнерството, за да се соочат со законот и со правдата“, изјави премиерот.
Случајот дополнително добива внимание поради судската постапка што во Кочани се води против неговата ќерка, Ива Михаилова. Таа е обвинета за предизвикување сообраќајна несреќа со смртни последици.
На Ива Михаилова судот ѝ забранил да ја напушта Македонија до завршувањето на постапката. Таа, пак, тврди дека има потреба од лекување во Бугарија.
