(Видео) Мицкоски: Очекувам младите од странство да се вратат во Македонија, животот на западот не е ист како пред пет години

Премиерот Христијан Мицкоски очекува развојот на нови индустрии, вклучително и дата-центрите и секторите што ќе ги сервисираат, да создаде услови дел од младите Македонци кои живеат и работат во странство да се вратат во земјата.

Тој се повика на податоци од Државниот завод за статистика, тврдејќи дека од третиот квартал на 2024 до вториот квартал на 2026 година бројот на вработени се зголемил за 17.000.

— реклама —

„Од 691.000 вработени до 708.000 вработени. Ако тоа го преточите во бројки, ќе сфатите дека претходната влада за седум години нема толку нови работни места отворено“, рече Мицкоски.

Според него, следниот чекор е создавање работни места во индустрии со поголема додадена вредност, кои би биле доволно атрактивни и за младите што веќе заминале од Македонија.

„Со оваа индустрија за која досега зборував и придружната индустрија која ќе ја сервисира оваа индустрија, јас очекувам голем дел од нашите, посебно младите кои се наоѓаат надвор од Македонија, да се вратат дома и токму тука да го продолжат животот со своите семејства“, изјави премиерот.

— реклама —

Мицкоски оцени дека економските и животните услови во Западна Европа веќе не се исти како пред пет или десет години, што, според него, дополнително може да влијае врз одлуката на дел од иселениците да се вратат.

— реклама —

Во истата насока, премиерот претходно посочи и на зголемен интерес на младите за инженерските факултети. Тој рече дека, според податоците што ги добил од неговиот матичен Машински факултет, интересот за запишување е зголемен за околу 30 проценти.

За Мицкоски, тоа е сигнал дека младите го препознаваат правецот во кој се движат технологијата и економијата, особено во областите на инженерството, вештачката интелигенција и дата-центрите.

„Имаме амбиција, знаеме каде да ја развиваме земјата и тоа е неповратен пат“, рече тој.

Според премиерот, изборот е дали Македонија активно ќе влезе во новиот технолошки циклус или повторно ќе остане во позиција да ги следи процесите откако веќе ќе се случат.

„Прашањето е дали ние ќе го одиме тој пат или ќе бидеме повторно на дното и, наместо да бидеме активни, повторно ќе бидеме реактивни“, рече Мицкоски.