Мицкоски од Истанбул: „Голем интерес кај турските компании за инвестиции во Македонија“

Премиерот Христијан Мицкоски од Истанбул порача дека постои сериозен интерес кај турските компании за инвестирање во Македонија, нагласувајќи дека Владата продолжува со активна промоција на можностите што ги нуди македонската економија пред странските инвеститори.

— реклама —

„Добар ден од Истанбул. Овде сум заедно со владина, но и со бизнис делегација. Ја продолжуваме традицијата на организирање B2B настани и средби, односно тоа што го започнавме во Унгарија, го продолживме во Австрија и со хрватската бизнис-заедница во Охрид, сега го продолжуваме овде во Истанбул“, изјави Мицкоски.

Тој истакна дека целта на посетата е македонските компании да воспостават директни контакти со турските бизниси и да се создадат нови можности за соработка и инвестиции.

— реклама —

„Постои навистина голем интерес кај турските бизнисмени за инвестиции во Македонија, а она што ние ќе го правиме овие два дена во Истанбул е да ги презентираме можностите на македонската економија и сета поддршка што Владата ја обезбедува за привлекување странски директни инвестиции“, рече премиерот.

— реклама —

Според него, првиот дел од настанот веќе завршил успешно, а во текот на посетата се очекуваат бројни билатерални средби со претставници на турскиот бизнис-сектор.

„Очекувам многу успешни состаноци и силни пораки да бидат испратени. Продолжуваме да информираме од нашата билатерална посета во Истанбул, Турција“, порача Мицкоски.

— реклама —

Посетата на Истанбул е дел од пошироката стратегија на Владата за интензивирање на економската дипломатија и привлекување нови странски инвестиции во земјата.