Премиерот Христијан Мицкоски изјави дека процесот за нормализирање на водоснабдувањето во Гостивар е во завршна фаза и дека очекува уште денес граѓаните да добијат вода безбедна и за пиење.
Одговарајќи на новинарско прашање за обвинувањата од опозицијата околу состојбата со водата и процесот на хиперхлорирање, Мицкоски рече дека Владата реагирала веднаш и презела конкретни мерки.
„Во овој случај, ние како држава што направивме? Обезбедивме за Гостиварци чиста вода за пиење. Им благодарам на сите општествено одговорни компании и лица што се приклучија и донираа“, рече Мицкоски.
Тој повтори дека причината за загадувањето било, како што рече, несовесното работење на вработени во ЈП „Водовод“ – Гостивар.
„Имавме несовесно работење на вработени од јавното претпријатие „Водовод“, кои директно со цевки и пумпи вода од река префрлиле во главниот резервоар. За тоа обвинителството постапува и веќе имаме лица кои се обезбедени, сослушани и очекувам истрагата да се проширува“, изјави премиерот.
Според него, во моментов се спроведува процес на хиперхлорирање што го изведуваат експерти од ЈП „Водовод и канализација“ – Скопје, а секојдневно се земаат мостри и се прават анализи.
„Веќе можам да кажам дека одиме кон ситуација кога можеби за првпат во последните децении во Гостивар граѓаните ќе можат да користат вода за пиење која ќе биде бактериолошки исправна. Но, замолувам за трпение, затоа што имаме сериозен пристап и сериозно го вршиме овој процес“, рече Мицкоски.
Тој додаде дека очекува уште денес, покрај техничката вода што веќе е достапна, граѓаните на Гостивар да добијат и вода што ќе може да се користи за готвење и пиење.
