Премиерот Христијан Мицкоски денеска изјави дека случајот со враќањето на пасошот на обвинетиот бизнисмен Борче Марковски е резултат на, како што рече, „груба манипулација“ од јавен обвинител во Битола и најави дека ќе биде спроведена истрага, но не прецизираше која институција ќе ја води.
За време на посетата на Битола, Мицкоски рече дека нема да открива имиња, но посочи дека според информациите со кои располага Владата, постои разлика меѓу извештајот на Основното јавно обвинителство и записникот од Вишото јавно обвинителство во Битола.
„Тука има груба манипулација од еден локален јавен обвинител во Вишото јавно обвинителство, којшто е соучесник во овој процес и тоа нема така да заврши. Ако сакав да кажам име и презиме, ќе кажев име и презиме. Допрва ќе има истрага и ќе следи истрага за овој процес“, изјави Мицкоски.
Случајот се однесува на обвинение за злоупотреби во јавните набавки во РЕК „Битола“, во кое е опфатен и бизнисменот Борче Марковски. Судскиот процес е закажан да започне на 2 септември во Основниот суд во Струга.
Претседателот на Основниот суд Струга, Вулнет Винца, претходно изјави дека пасошот на Марковски му бил вратен затоа што приложил гаранција во вредност од над пет милиони евра, посочувајќи дека според законот не може истовремено да биде определена имотна гаранција и да му биде одземена патната исправа.
По ова реагираше Јавното обвинителство, кое соопшти дека Основното јавно обвинителство во Струга првично дало негативно мислење за враќање на пасошот, но по реферирањето на предметот во Вишото јавно обвинителство во Битола било дадено позитивно мислење.
Според Обвинителството, вишиот јавен обвинител оценил дека со определената гаранција е намалена опасноста од бегство и ги прифатил аргументите на одбраната дека Марковски треба да отпатува во Србија поради работењето на компанија што ја поседува таму.
