Премиерот Христијан Мицкоски изјави дека Владата и ВМРО-ДПМНЕ се подготвени да прифатат една изборна единица, па дури и барањата на Левица за повеќе пари за финансирање на кампањите на помалите партии, доколку тоа овозможи да биде донесен новиот Изборен законик.
Тој рече дека на вчерашната средба во Собранието ВМРО-ДПМНЕ јасно го повторила ставот дека воведувањето на гласање на дијаспората е стратешка цел, но оцени дека дел од политичките партии настапиле со позиции кои, според него, не оставаат простор за договор.
„Имаше вчера состанок во рамките на Парламентот. Ние како политичка партија јасно дадовме до знаење дека поширокото гласање е наша стратешка цел. Од друга страна, дел од политичките партии излегоа со сосема радикализирани позиции. Едната беше да се гласа со државен консензус, што за нас не е прифатливо. Практично, тоа е позиција со која некој однапред не сака да има договор“, рече Мицкоски.
Осврнувајќи се на барањата на Левица и СДСМ, Мицкоски порача дека ВМРО-ДПМНЕ нема проблем да ги прифати нивните предлози доколку тоа значи усвојување на законските измени.
„Нашиот став е јасен. Ако сакаат повеќе пари, добро, нека има помалку за нас, а повеќе за нив. Потоа ќе се согласиме и за една изборна единица. Подготвени сме да ги прифатиме сите барања на СДСМ и нивните коалициски партнери“, изјави Мицкоски.
Тој нагласи дека демократијата подразбира одлучување со мнозинство, а не со консензус.
„Никој принципиелно не одлучува со консензус, освен во еднопартиски систем. Демократијата значи мнозинството да носи одлуки. Не сме консензуална држава“, рече премиерот.
Мицкоски додаде дека Владата останува на предлогот за воведување гласање по пошта, по примерот на повеќе земји од Европската Унија.
Воедно оцени дека дел од опозициските партии се обидуваат да го блокираат донесувањето на Изборниот законик поради, како што рече, „страв од пораз на следните парламентарни избори“ и со тоа го забавуваат исполнувањето на реформските обврски на државата.
