Повеќе од 1.200 проекти во моментов се реализираат на територијата на целата држава, а Владата ќе продолжи со инвестиции во образованието и во проекти на локално ниво, порача премиерот Христијан Мицкоски.
Обраќајќи се на настан посветен на реализација на проект во областа на образованието и спортот, Мицкоски истакна дека изградбата на вакви објекти е важна за создавање подобри услови за децата, но и за нивниот физички и духовен развој.
Тој најави дека Владата ќе продолжи да ги поддржува проектите во периодот што следува, со цел реализирање на преземените обврски и ветувања.
„Повеќе од 1.200 проекти веќе се реализираат на целата територија на државата. Мислам дека Македонија во моментот е претворена во едно големо градилиште“, рече Мицкоски, додавајќи дека тоа била една од целите на Владата.
Премиерот најави дека и во следната година преку ЗЕЛС ќе бидат охрабрени градоначалниците да подготвуваат нови проекти согласно можностите на општините. Владата, како што посочи, планира и дел од средствата од централниот буџет да ги насочи кон општините, со што би се овозможила реализација на уште поголем број проекти.
Мицкоски упати честитки до градоначалничката, членовите на општинскиот совет и администрацијата за реализацијата на проектот, како и до министерката за образование и останатите членови на Владата кои учествуваат во финансирањето на проектите наменети за општините.
Тој изрази надеж дека од новиот спортски објект ќе произлезат успешни спортисти и репрезентативци кои со гордост и достоинство ќе ги претставуваат боите на Македонија.
