СДСМ преку соопштение го обвини премиерот Христијан Мицкоски дека со своја изјава за одлуките на Врховниот суд во предметите „Ласкарци“ и „Јакимовски“ потврдил дека извршната власт има влијание врз институциите на правосудството.
Од СДСМ ја издвојуваат изјавата на Мицкоски: „Вие бркате, затворате, тие ги пуштаат на слобода“, со која тој ги коментирал одлуките на Врховниот суд.
Од опозициската партија прашуваат како премиер може да „брка и затвора“ и велат дека таквата изјава, според нив, претставува уште еден доказ дека обвинителството постапува по налог на Мицкоски.
„Како еден премиер да брка и да затвора? Како еден премиер да гони?“, прашуваат од СДСМ.
Од партијата нагласуваат дека премиерот не е обвинител, судија или полициски инспектор, но оценуваат дека Мицкоски јавно зборува за тоа кој „брка и затвора“, а кој „пушта“.
СДСМ тврди дека тоа покажува оти обвинителството, судовите, АНБ и полицијата се под контрола на премиерот, како и дека правдата е селективна, а институциите се користат како инструмент на политичка волја.
„Кога сакаат – гонат. Кога сакаат – се оградуваат. Кога сакаат – пуштаат, затвораат“, наведуваат од СДСМ.
Од опозициската партија дополнително го обвинија владеењето за, како што велат, „организирана криминална група што ги зароби институциите“, барајќи итно враќање на независноста на обвинителството и судството.
Од СДСМ порачаа дека премиерот не смее да гони и апси и дека законот мора еднакво да важи за сите, а не да се применува според политичка наредба.
