Претседателот на Владата, Христијан Мицкоски, изјави дека во изминатите две години просечната плата е зголемена за 8.000 денари, а просечната пензија за 7.000 денари, оценувајќи дека Владата постигнала значителен напредок и покрај тоа што, како што рече, има уште многу работа.
Во интервју за телевизија Сител, Мицкоски посочи дека економскиот раст, кој претходно изнесувал 1,8 проценти, сега достигнал 3,5 проценти, а истовремено се реализираат повеќе капитални инфраструктурни проекти.
„За првпат во исто време се градат шест автопатски делници. Во понеделник ќе го потпишеме договорот за изградба на автопатот Блаце – Скопје, а наскоро очекуваме да заврши и постапката за делницата Букојчани – Кичево“, рече премиерот.
Тој најави дека до следната година очекува да биде пуштен во употреба автопатот Кичево – Охрид, како и првите десет километри од автопатот Прилеп – Битола, додека изградбата на делниците Тетово – Гостивар и Гостивар – Букојчани ќе биде во полн интензитет.
Мицкоски истакна и дека се забележува раст во земјоделското производство, наведувајќи дека годинава се откупени повеќе тутун и грозје во споредба со претходната година. Според него, значително е подобрена и состојбата со акумулациите, а се сервисираат и обврските кон јавните претпријатија.
„Владата работи макотрпно и е целосно насочена кон реализација на проектите и подобрување на животниот стандард на граѓаните“, изјави Мицкоски.
