Мицкоски: Реконструкцијата ќе значи нова енергија, ВМРО-ДПМНЕ добива две нови министерства — здравство, социјала и демографија

Премиерот Христијан Мицкоски најави дека претстојната реконструкција на Владата треба да донесе нова енергија и подобра ефикасност во работата, посочувајќи дека предлозите најпрво ќе бидат разгледани од Извршниот комитет на ВМРО-ДПМНЕ, а потоа ќе бидат доставени до Собранието.

— реклама —

Во интервју за емисијата „Директно“ на ТВ Телма, Мицкоски истакна дека реконструкцијата не е резултат само на незадоволителна испорака, туку и на потребата од подобрување и промена на приоритетите во рамките на владината коалиција.

— реклама —

„Не секогаш треба да менуваме затоа што имаме помала испорака од очекуваната, но секогаш можеме да бидеме подобри од тоа што сме. Оваа реконструкција е комбинација од сите тие фактори“, рече Мицкоски.

Тој откри дека во рамките на реконструкцијата ВМРО-ДПМНЕ ќе ги преземе ресорите здравство и социјална политика, демографија и млади, кои досега ги водеа коалициски партнери.

— реклама —

Според Мицкоски, коалицијата ВРЕДИ ќе раководи со Министерството за култура, Министерството за правда и Министерството за односи меѓу заедниците, додека Министерството за земјоделство ќе му припадне на ЗНАМ.

— реклама —

Покрај тоа, ЗНАМ ќе добие и дополнителна функција заменик-министер, за што ќе се разговара наесен, кога на дневен ред ќе бидат и заменичките позиции во Владата.