Премиерот Христијан Мицкоски најави дека Владата веќе размислува за изградба на нов Клинички центар во Скопје, а како најсериозна опција се разгледува локацијата кај спортскиот центар „Борис Трајковски“.
Тој посочи дека во моментов приоритет е завршување на проектите за клиничката болница во Штип, студентскиот дом и Факултетот за медицински науки, студентскиот дом во Кичево со проширена дејност и клиничката болница во Тетово, за кои веќе има индикативни и, како што рече, поволни понуди од потенцијални финансиери.
„Во меѓувреме размислуваме и за големиот клинички центар, кој во Скопје би требало да се изгради. Разгледуваме локација пред базенот ‘Борис Трајковски’, бидејќи има одлична сообраќајна поврзаност, пристап до гас и близина до обиколницата“, изјави Мицкоски.
Тој откри дека земјиштето е во приватна сопственост и дека се водат разговори со сопственикот за можна замена, по што би следувала промена на намената со специјален закон.
Според планот, новиот ултрамодерен Клинички центар би бил поврзан со болницата „8 Септември“ преку топол подземен премин под булеварот „Илинденска“, а во комплексот би биле вклучени и ПЕТ-центарот и поликлиниката „Букурешт“.
„Ако биде сè во ред, очекувам во текот на следната година да имаме почеток на активностите и за овој проект“, рече премиерот.
