Премиерот, Христијан Мицкоски, одговарајќи на новинарско прашање за критиките од СДСМ поврзани со европската перспектива на државата и животниот стандард, изјави дека политиките на претходната власт се поразени и дека на следните избори ќе бидат, како што рече, целосно декласирани, стои во соопштението од Владата.
Мицкоски се осврна на, како што го нарече, вчерашниот настан организиран од СДСМ во Собранието, обвинувајќи дека ветувањата од 2018 година не биле исполнети.
Тој праша дали биле реализирани ветувањата за подобро здравство, образование, повисоки пензии и економски раст, додавајќи дека, според него, одредени поединци финансиски профитирале во тој период, стои во соопштението.
Премиерот наведе дека актуелната Влада спроведува мерки за подобрување на животниот стандард, меѓу кои зголемување на пензиите, субвенции за млади, инвестиции во студентски домови и поддршка за земјоделството. Спомена и исплата на заостанати обврски во одредени јавни претпријатија, стои во соопштението.
Како што е наведено во соопштението ,во однос на здравствениот сектор, Мицкоски упати критики кон претходното раководство, наведувајќи примери од периодот на пандемијата и набавките на вакцини, кои според него биле направени по високи цени.
„Оваа политика е поразена и ќе биде декласирана на следните избори“, изјави Мицкоски, додавајќи дека иднината на политиката треба да ја водат, како што рече, одговорни и патриотски ориентирани луѓе.
