Македонија мора да излезе од рамките на краткорочното размислување и да гради политики што ќе дадат резултати во наредните децении, порача премиерот Христијан Мицкоски на петтиот состанок на Националниот совет за развој, посветен на спроведувањето на Националната развојна стратегија 2024-2044.
Според него, државите кои немаат јасна визија и долгорочен план ризикуваат да останат на маргините на глобалните развојни процеси, особено во време на брзи економски, технолошки и геополитички промени.
Мицкоски оцени дека Националната развојна стратегија претставува еден од најзначајните документи создадени во поновата историја на државата, бидејќи зад неа стојат широк општествен консензус, експертски труд и долгорочна визија за развој.
„Успехот на една стратегија не се мери по бројот на страници што ги содржи, туку по бројот на животи што ќе ги подобри“, истакна премиерот, додавајќи дека најважно е колку млади луѓе ќе изберат својата иднина да ја градат во Македонија.
Тој нагласи дека граѓаните не очекуваат нови стратегии и ветувања, туку конкретни резултати во вид на подобри работни места, поквалитетно образование, подобро здравство, модерна инфраструктура и ефикасни институции.
Осврнувајќи се на работата на Националниот совет за развој, Мицкоски истакна дека повеќе од 1.200 претставници од институциите, бизнис-заедницата, науката, локалната самоуправа и граѓанскиот сектор учествувале во процесот на креирање мерки и политики, од кои дел веќе се реализираат.
Премиерот посебно ја нагласи важноста на инвестициите, иновациите, дигиталната трансформација и развојот на човечкиот капитал, оценувајќи дека токму тие ќе ја определат конкурентноста на државата во следните две децении.
Говорејќи за демографските предизвици, Мицкоски порача дека ниту една економска или политичка реформа нема да има целосна смисла доколку државата не успее да создаде услови младите да останат, да формираат семејства и да ја гледаат својата иднина во Македонија.
„Демографската политика не е само прашање на статистика. Таа е прашање на национална одржливост и иднината на државата“, рече Мицкоски.
Тој оцени дека годишниот извештај за спроведување на Националната развојна стратегија претставува почеток на долгорочен процес кој ќе бара континуитет, политичка зрелост и посветеност на реформите.
„Доколку останеме посветени на развојот, инвестициите и модернизацијата на институциите, во 2044 година ќе можеме со гордост да кажеме дека сме изградиле посилна, побогата и поуспешна Македонија“, порача премиерот.
