Мицкоски уверува: Нема да има поскапување на струјата, можно е и поевтинување

Македонија, според најавите на Владата, ја очекува стабилна грејна сезона без нов енергетски удар врз граѓаните. Премиерот Христијан Мицкоски уверува дека ќе има доволно енергенти, стабилно снабдување и дека цената на електричната енергија од јануари нема да се зголеми, а се разгледува и можноста за поевтина струја или продолжување на евтината тарифа.

„Сакам да ги уверам граѓаните дека ќе имаме стабилна зима, со стабилно снабдување со енергенти, без осцилации во цената или количината“, порача Мицкоски.

Како главни аргументи за стабилноста, премиерот ги посочува поволната хидролошка состојба, ремонтите на термоенергетските постројки и договорот за обезбедување јаглен од Косово за домашните термоцентрали.

— реклама —

ЕСМ склучи тригодишен договор со косовската КЕК за експлоатација на околу три милиони тони јаглен. Од компанијата посочија дека договорот треба да овозможи дополнително производство на електрична енергија и заштеди во споредба со набавката на струја од странство.

Логиката на Владата е дека поголемото домашно производство ќе ја намали потребата од увоз во периоди кога цените на европските берзи се високи. Сепак, крајната цена на струјата не зависи само од цената на јагленот, бидејќи во трошокот влегуваат и ископот, транспортот, преработката и производството на електрична енергија.

Мицкоски како предност ја посочува и состојбата со водните акумулации кои, според него, се на високо ниво. Сепак, производството од хидроцентралите ќе зависи и од хидролошките услови во текот на зимата.

— реклама —

Неизвесност постои и кај цените на гасот и на нафтените деривати. Мицкоски очекува можно зголемување на цената на гасот во Европа, но смета дека тоа нема да предизвика сериозен удар врз Македонија.

„Македонија не е голем консумент и, со оглед на технологијата, не очекувам какви било шокови“, рече премиерот.

Тој ја посочи и когенеративната постројка ТЕ-ТО, која истовремено произведува топла вода и електрична енергија, што, според него, овозможува дел од повисоките трошоци да се амортизираат.

— реклама —

Кај нафтените деривати, Мицкоски потсети на мерките што Владата ги презеде преку прогласената кризна состојба и намалените акцизи. Тој тврди дека поради овие мерки горивата во Македонија се поевтини во споредба со соседните земји.

Премиерот уверува дека и државните резерви се на солидно ниво, а продуктоводот „Вардакс“ е полн. Според информациите од увозниците, има доволни количества нафтени деривати.

„Во овој момент, не гледам можност и причина за стравување во текот на зимата“, порача Мицкоски.

— реклама —

Опозицијата, пак, има поинаква проценка. Лидерот на СДСМ, Венко Филипче, предупреди дека следува нов бран поскапувања и ја обвини Владата дека создава нереална слика за економската состојба.

Филипче вчера изјави дека енергетскиот сектор лошо се менаџира и дека има пад на домашното производство. Тој очекува поскапување и на електричната енергија и на парното.

Така, додека власта уверува дека повисокото домашно производство, резервите и владините мерки ќе овозможат стабилна зима без поскапување на струјата, опозицијата предупредува дека граѓаните се соочуваат со нови зголемувања на енергетските трошоци.