Во пресрет на најавената реконструкција на Владата, премиерот Христијан Мицкоски соопшти дека во петок и сабота ќе има средби со коалициските партнери од ВРЕДИ и ЗНАМ, на кои ќе се разговара за претстојните промени.
Говорејќи пред медиумите по посетата на реконструираната Општа болница во Струмица, Мицкоски нагласи дека разговорите се дел од редовната координација во рамките на владејачкото мнозинство.
„Во петок и сабота се закажани средбите со коалициските партнери од ВРЕДИ и ЗНАМ. Сега не сме пред избори, туку сме во втората половина од мандатот и имаме исклучително коректна и пријателска соработка со ВРЕДИ. Очекувам во таа насока да продолжиме“, изјави Мицкоски.
Тој додаде дека партнерството меѓу ВМРО-ДПМНЕ и ВРЕДИ досега дало резултати и на локално ниво.
„По реализирањето на нашата соработка по изборите во 2024 година следеа локалните избори, на кои тие убедливо победија во 10 општини. Затоа не гледам пречка во овој момент нашата соработка да не продолжи“, истакна премиерот.
Средбите со коалициските партнери се очекува да ги отворат и прашањата поврзани со кадровските решенија и идната динамика на работата на Владата.
