Премиерот Христијан Мицкоски на денешната прес-конференција порача дека Владата останува активен партнер на стопанството, со фокус на создавање предвидлива деловна клима, ефикасни институции, модерна инфраструктура и квалитетно образование како предуслов за одржлив економски развој.
Обраќајќи се на економски форум посветен на одржливиот развој, Мицкоски истакна дека денешните економски предизвици бараат нов пристап, при што одржливоста повеќе не е избор, туку услов за конкурентност на компаниите и државата.
Тој нагласи дека Владата има цел да изгради економија која ќе создава сигурност, ќе биде отпорна на кризи и ќе овозможи младите да ја градат својата иднина во земјата.
Осврнувајќи се на економските показатели, Мицкоски рече дека по просечниот реален раст на БДП од околу 1,8 проценти во периодот од 2017 до 2023 година, економијата во 2024 година пораснала за три проценти, а во 2025 година за 3,5 проценти. Според него, тоа е резултат на зголемената доверба, стабилизирањето на јавните финансии и поддршката за инвестициите.
Тој посочи и дека инфлацијата е значително намалена во однос на периодот на енергетската криза, додавајќи дека Владата очекува до крајот на годинава таа да се спушти под четири проценти.
Премиерот истакна дека растот на платите е еден од најважните показатели за подобрување на животниот стандард. Според него, номиналниот раст на платите во 2024 година изнесувал 12,6 проценти, а во 2025 година 9,6 проценти, при што е забележан и реален раст на примањата.
Во своето обраќање Мицкоски потенцираше дека државата навремено ги сервисира своите финансиски обврски, што, како што рече, испраќа позитивен сигнал до инвеститорите и меѓународните финансиски институции.
Тој најави дека Владата ќе продолжи да ги поддржува компаниите во зелената и дигиталната трансформација, ќе работи на подобар пристап до финансии, намалување на административните процедури, подобрување на инфраструктурата и поголема интеграција со европските пазари.
На крајот, Мицкоски упати благодарност до Европската Унија, Обединетите Нации, меѓународните партнери, како и до домашните компании, претприемачи и работници, нагласувајќи дека целта е изградба на држава во која успехот ќе се темели на знаење, иновации и конкурентна економија.
