СДСМ преку соопштение соопшти дека истрагата што, според нив, ја отворил новиот унгарски премиер Петер Маѓар за кредитот од една милијарда евра одобрен од унгарската влада за Македонија, отвора сериозни прашања и може да има пошироки последици.
Од партијата тврдат дека не станува збор само за финансиска проверка, туку за процес кој, според нив, ќе ги опфати и околностите под кои бил одобрен заемот. Во соопштението се наведува дека кредитот претходно бил оценет во европски извештаи како „сомнителен заем од кинески пари“.
СДСМ изнесува и тврдења дека дел од медиумскиот простор во Македонија бил поврзан со, како што велат, медиумската мрежа на поранешниот унгарски премиер Виктор Орбан, додавајќи дека по политичките промени во Унгарија било прекинато финансирањето на дел од тие структури.
Во соопштението партијата тврди дека потоа било обезбедено ново финансирање преку Алта банка, при што изнесува обвинувања за поврзаност со маркетинг-агенции и медиумски проекти во Македонија. СДСМ, исто така, наведува дека се подготвува почеток на работа на „Euronews Македонија“, изнесувајќи тврдења за начинот на обезбедување на лиценцата и за ангажирање новинарски кадар.
Од партијата во соопштението оценуваат дека целта е воспоставување, како што наведуваат, целосна контрола врз медиумскиот простор и ограничување на информирањето на јавноста за случаи што предизвикуваат интерес.
На крајот од соопштението, СДСМ тврди дека истрагите во Унгарија се само почеток и оценува дека евентуалните меѓународни истраги би можеле да имаат и кривично-правни импликации. За изнесените тврдења во соопштението нема приложени докази.
