Мицкоски за минимална плата од 600 евра: Јас сум за повисоки плати, но тоа треба да се договори со работниците и работодавачите

Премиерот Христијан Мицкоски вели дека е за зголемување на минималната плата и за повисоки плати, но не се изјасни конкретно дали Владата ќе го поддржи барањето на СДСМ минималната плата да се зголеми на 600 евра.

Одговарајќи на прашање за предлогот на опозицијата, Мицкоски најпрво упати остри критики кон СДСМ, оценувајќи дека партијата нема политички и јавен кредибилитет.

— реклама —

„Ова што вие го поставувате како прашање е од опозицијата која ја уништи, ја ограби Македонија, опозицијата која нема никаков кредибилитет, ниту јавен ниту политички, опозиција која во моментот е заглавена во своето политичко мочуриште и опозиција која, мислам дека уште долго време ќе се наоѓа на маргините на политичката сцена“, рече Мицкоски.

— реклама —

Сепак, премиерот порача дека го поддржува растот на минималната и на останатите плати, но смета дека износот треба да биде резултат на договор меѓу работниците и работодавачите

„Да, јас сум за зголемување на минималната плата. Да, јас сум за повисоки плати, но исто така тој процес треба да се води во рамките на социјалниот дијалог помеѓу работниците и работодавачите“, изјави Мицкоски.

— реклама —

СДСМ предлага минималната плата да се зголеми на 600 евра, односно 36.960 денари. Партијата предлага и субвенционирање на придонесите за приватните компании со цел зголемувањето да не падне целосно на товар на работодавачите.

Претседателот на СДСМ, Венко Филипче, во повеќе наврати побара владејачкото мнозинство да го поддржи предлогот во Собранието, образложувајќи го барањето со растот на трошоците за живот.

Мицкоски денеска не кажа дали Владата би прифатила минимална плата конкретно од 600 евра, туку остана на ставот дека зголемувањето на платите треба да се решава преку социјален дијалог.