Премиерот Христијан Мицкоски денеска порача дека Владата ги поддржува земјоделците и нивните барања, откако земјоделци од Струмичко најавија протести. Според него, нивните барања се легитимни, а Владата ќе ги искористи механизмите што ѝ стојат на располагање за да им помогне.
„Апсолутно сакам да кажам дека како Влада ги поддржуваме земјоделците и нивните барања и тука нема никаква дилема. Затоа што тие се луѓето коишто нè хранат“, изјави Мицкоски, оценувајќи дека годинава е исклучително предизвикувачка за земјоделскиот сектор.
Тој посочи дека Владата, според можностите што ги има, ќе направи сè што може за да им излезе во пресрет на земјоделците, потсетувајќи и на мерките што, како што рече, досега биле преземени за подобрување на условите во секторот.
Како еден од примерите го наведе управувањето со акумулациите и каналите за наводнување. Мицкоски рече дека кога актуелната Влада била избрана во јуни 2024 година, акумулациите биле исполнети со само седум отсто вода, додека сега, според него, нивната исполнетост е околу 60 отсто.
„Нема добра реколта без исчистени канали за наводнување и без полни акумулации. Денеска добив информација дека водостојот на акумулациите и реките е најнизок околу Голема Богородица, а нашите акумулации се некаде околу 60 отсто. Значи, завршува сезоната на наводнување, некаде околу 60 отсто се полни. Ќе ве потсетам, на 23 јуни, кога оваа Влада беше избрана, процентот во акумулациите беше седум. Тоа не беа акумулации, беа мочуришта“, рече премиерот.
Мицкоски истовремено ја критикуваше претходната власт за состојбата што, според него, била затекната во земјоделскиот сектор. Тој посочи дека во Национални шуми и АД Водостопанство, при преземањето на власта, имало неисплатени плати за неколку месеци, а во јуни 2024 година, како што рече, сè уште не биле исплатени одредени субвенции од 2020 година.
Премиерот порача дека земјоделците и натаму ќе ја имаат поддршката од Владата и нагласи дека тие се нејзини партнери.
„Земјоделците ја имаат апсолутно нашата поддршка, вистинските земјоделци се наши партнери и ние продолжуваме да бидеме како Влада вистински партнери на вистинските земјоделци“, истакна Мицкоски.
