Премиерот Христијан Мицкоски на денешната прес-конференција ја поздрави ослободителната пресуда во предметите „Талир 1“ и „Талир 2“, оценувајќи дека со неа конечно била задоволена правдата во однос на ВМРО-ДПМНЕ.
Одговарајќи на новинарско прашање, Мицкоски изјави дека партијата во минатото била изложена на политички прогон и, како што рече, агресија од страна на тогашната власт преку, според него, конструирани судски предмети.
„Мојот став е многу јасен. ВМРО-ДПМНЕ во тој период беше предмет на политички прогон и агресија од страна на претходната Влада. Беа измислени случаи како ‘Талир 1’ и ‘Талир 2’. Вчера судот донесе пресуда која е во согласност со правдата и со она што го очекуваат граѓаните“, изјави премиерот.
Осврнувајќи се на ослободителната пресуда за поранешниот лидер на ВМРО-ДПМНЕ Никола Груевски, Мицкоски рече дека, според образложението на судот, таа е последица на измените на Кривичниот законик донесени за време на владата на СДСМ и ДУИ.
Според него, токму тие законски измени довеле до, како што рече, бројни политички амнестии и ќе имаат последици и во иднина.
„Од она што можев да го прочитам од образложението на Основниот кривичен суд, можам да заклучам дека станува збор за последица на измените на Кривичниот законик донесени од претходната влада на СДСМ и ДУИ. Ние и претходно предупредувавме дека поради тие измени имаше, но и ќе има многу политички амнестии. За жал, кога еднаш ќе направите грешка, таа потоа станува правило и ве следи“, рече Мицкоски.
Тој додаде дека, кога станува збор за ВМРО-ДПМНЕ, смета дека со донесената пресуда „конечно правдата е задоволена“.
