Премиерот Христијан Мицкоски изјави дека во овој момент не е запознаен со новиот урбанистички план за Водно, за кој дел од стручната јавност предупредува дека би можел да има сериозни последици врз Скопје, но порача дека Владата нема да поддржи никакво решение што би било спротивно на интересите на граѓаните.
Одговарајќи на новинарско прашање, Мицкоски рече дека најпрво треба да го види планот пред да дава коментари.
„Не знам јас за каков план и за кои стручници зборуваме. Прво, ќе ми дозволите да го погледам, па потоа да дадам коментари. Навистина не сум запознаен. Ниту кои стручници давале мислење, ниту пак за план којшто Општина Центар планира да го носи“, рече Мицкоски.
Тој посочи дека станува збор за план што го подготвува Општина Центар, каде градоначалник е од СДСМ, па оцени дека прашањата во врска со неговата подготовка треба да бидат упатени до локалната власт.
Воедно, премиерот нагласи дека доколку планот стигне до институциите во кои Владата има надлежност, ќе биде разгледан внимателно.
„Кога ќе дојде тоа во институциите каде што ние како Влада имаме ингеренции, да речеме Министерството за транспорт, секако дека нема ниту милиметар да направиме чекор којшто ќе биде спротивен на интересите на граѓаните“, изјави Мицкоски.
Осврнувајќи се на информациите дека советниците на ВМРО-ДПМНЕ го поддржале планот, тој рече дека станува збор за различна постапка и дека конечната реализација е далеку.
„Тоа беше ноторна на лага. Дека советниците на ВМРО поддржале план. Ако зборувате за иницијатива, тоа е сосема нешто друго. За да тоа се реализира, има уште четири-пет чекори до негова реализација“, рече Мицкоски.
Тој повтори дека Владата нема да поддржи решение кое, според нејзина оценка, би било спротивно на интересите на граѓаните.
„Јавно, како претседател на Владата, зборувам. Тој план допрва треба да дојде во институциите коишто ги води Владата и ние нема ниту милиметар да направиме којшто ќе биде спротивен на интересите на граѓаните“, изјави Мицкоски.
