„Изминативе повеќе од 20 години откако се стекнавме со статусот кандидат, ние направивме толку многу, како ниту една земја којашто станала членка на Европската Унија или којашто пледира да биде дел од ЕУ, во делот на идентитетот, а во делот на суштинските реформи не сакам да дискутирам бидејќи мислам дека сме многу понапред и од одредени членки на самата Европска Унија, но кога станува збор за идентитетските реформи направивме толку многу што за нас, не за мене лично или како Влада туку генерално како граѓани на државата, би претставувало дополнителна фрустрација и понижување. Доколку не добиеме јасен план дека ова е последно и дека од тој момент па натаму ќе важи принципот на испорака merit-based и нема повеќе да има идентитетски и билатерални барања и нема да има дополнителни препреки на тој пат, односно ќе се водиме само по Копенхагеншките критериуми, ние сме подготвени да работиме колку што е потребно за да не придонесеме со дополнителна фрустрација кај македонските граѓани“, рече премиерот Христијан Мицкоски во интервју за телевизија Телма, осврнувајќи се на евроинтегративниот процес на државата.
Мицкоски напомена дека програмата со која настапил на изборите добила мнозинска поддршка од граѓаните и дека ќе продолжи да ја реализира сè додека ја има нивната доверба.
„Сè додека ја извршувам оваа позиција како претседател на Владата на сите граѓани, ќе се трудам бескомпромисно да ги штитам македонските национални интереси, бидејќи ценам дека сите граѓани, од сите етнички заедници и сите политички определени и неопределени во државата, доволно направија во име на евроинтегративните процеси, во име на идентитетските отстапки и заслужуваат многу повеќе, дури и од некои земји членки, да бидат дел од масата во Брисел. Исто така, заслужуваат подобар и пофер третман, дури и од некои земји членки кои седат на масата во Брисел. Тоа е она што како заклетва сум го кажал пред граѓаните – дека ќе го штитам и бранам Уставот. Јас го штитам и бранам Уставот и со ништо нема да придонесам тој повторно да биде понижен и омаловажен, а притоа да не обезбедам јасна, сигурна и предвидлива иднина за граѓаните“, потенцираше Мицкоски.
Тој истакна дека во моментов Македонија бележи подобри резултати од некои земји членки на Европската Унија и дека лично верува оти државата располага со капацитет, кадар и ресурси за уште поголеми успеси.
„Ако ги споредиме бројките, ќе видиме дека во овој момент економските перформанси на Македонија во последните две години се многу подобри отколку кај некои земји членки на ЕУ“, рече Мицкоски.
Тој додаде дека не е безнадежен и дека силно верува во потенцијалот на македонскиот народ.
„Јас верувам во македонскиот потенцијал и ќе споделам со вас еден податок за кој вчера бев информиран од Министерството за внатрешни работи. За првпат по долго време, во 2026 година досега имаме повеќе барања за поврат на македонско државјанство отколку барања за откажување од македонско државјанство. Околу 672 барања се за поврат на државјанството, а околу 318 се за отпис. Ова е прва година по долго време кога се случува такво нешто. Дали тоа е случајност, не можам да кажам, но јас верувам во македонскиот народ, во македонските граѓани и во нивниот потенцијал. Јас сум професор на универзитет, знам каков потенцијал сум образувал, знам со каков потенцијал располагаме и знам дека можеме многу повеќе, и покрај тоа што постојат сили кои не сакаат оваа држава да успее и шират дефетизам“, истакна Мицкоски.
