Премиерот Христијан Мицкоски изјави дека од самитот во Тиват се враќа задоволен и охрабрен, оценувајќи дека пораките од европските лидери биле најсилни досега кога станува збор за европската перспектива на земјите од Западен Балкан.
Според него, на самитот било потврдено дека процесот на проширување на Европска Унија останува активен и дека паралелно со него се подготвува нов механизам за продлабочување на односите меѓу Унијата и земјите од регионот.
Мицкоски посочи дека од разговорите со францускиот претседател Емануел Макрон и германскиот канцелар Фридрих Мерц добил уверување дека се работи на документ кој ќе овозможи користење на одредени европски алатки и механизми од страна на земјите од Западен Балкан.
„Тој документ не е во конфликт со проширувањето. Станува збор за два паралелни процеси – едниот е нов механизам за соработка, а другиот останува процесот на проширување“, рече премиерот.
Тој нагласи дека на самитот повеќепати било потенцирано дека напредокот на земјите ќе се оценува врз основа на заслуги и спроведени реформи, а не врз основа на билатерални прашања.
„Мојот оптимизам се темели на тоа што јас бев единствениот кој од земјите од западен Балкан имаше билатерални состаноци и со францускиот претседател Макрон и со германскиот канцелар Мерц. И точно знам што се зборуваше на тие состаноци и точно знам што ќе следи во периодот којшто е пред нас. Дел од планот подразбира завршување и затворање на одредени кластери, тоа значи почеток на преговори. На самите состаноци ја пренесов сета она политика и сето она за којешто зборуваме изминатиит период.
Од страна на соговорниците добив одговори на некои од дилемите и кога ќе го имаме сето ова во предвид, оттаму доаѓа мојот оптимизам и инспирација, но не е точно тезата, дека се потребни измени на договори за да може овој план да биде функционален, тоа е така прецизно направено за да овозможи механизми со кои што дури и тие кои што се само кандидати, бидејќи станува збор за Западен Балкан, а од тие земји имаме земји кои што не се ни кандидати. Така што имајќи го предвид, сето тоа што го разговаравме таму, мене ми дава за право да дојдам до тој заклучок“, вели Мицкоски.
