СДСМ преку соопштение го нападна премиерот Христијан Мицкоски поради неговиот престој во Бриж и Брисел, оценувајќи дека по завршувањето на семејниот одмор следува „стручниот дел“ од неговото патување.
Од опозициската партија иронично коментираат дека Мицкоски одбрал да летува во Бриж, додека претходно ги повикувал граѓаните летниот одмор да го поминат во Македонија и да избегнат долгото чекање на граничните премини.
„Денеска официјално завршува семејното летување и екскурзијата на Мицкоски во Бриж“, наведуваат од СДСМ.
Од партијата велат дека од денеска Мицкоски се сели во Брисел, каде што, како што иронично наведуваат, започнува „стручниот, француски дел“ од неговото патување.
СДСМ се осврнува и на прашањето за францускиот предлог и очекувањата од престојот на премиерот во Брисел.
„Со нетрпение чекаме да слушнеме што точно научил за францускиот предлог. Дали конечно сфатил дека францускиот предлог е добар?“, прашуваат од СДСМ.
Од партијата го поврзуваат ова и со неодамнешните изјави на министерот за надворешни работи Тимчо Муцунски дека протоколите не се дел од преговарачката рамка.
СДСМ оценува дека Мицкоски ќе мора да им објасни на своите гласачи доколку неговите позиции во однос на европските интеграции се променат, обвинувајќи го дека досегашната „патриотска приказна“ повеќе не може да се одржува.
Во соопштението опозициската партија упатува и низа други политички обвинувања кон Владата, поврзувајќи ги со економската состојба, пензиите и платите, како и со односите со Србија и Унгарија.
СДСМ на крајот порачува дека ќе го следи престојот на Мицкоски во Брисел и најавува дека ќе чека да види со какви пораки премиерот ќе се врати во Македонија.
„Ќе почекаме уште четири дена. Да видиме низ каква катарза ќе помине Мицкоски овој пат“, стои во соопштението на СДСМ.
