Република Ирска ја потврди својата континуирана поддршка за европската перспектива на Македонија и за нејзиниот напредок кон членство во Европската Унија. Поддршката беше истакната на билатерална средба меѓу македонската и ирската парламентарна делегација во рамки на Интерпарламентарната конференција „EU Enlargement: A Strategic Agenda for Europe’s Future“ во Тирана.
Македонската делегација ја предводеа потпретседателот на Собранието и претседател на Комисијата за европски прашања, Антонијо Милошоски, и пратеничката Даниела Белимова, додека од ирска страна учествуваше делегација предводена од Бери Ворд, претседател на Заедничката комисија за прашања на Европската Унија при ирскиот парламент.
На средбата било истакнато дека пристапниот процес треба да се темели на јасни, објективни и мерливи критериуми, со фокус на исполнувањето на Копенхашките критериуми, спроведувањето на реформите и постигнатите резултати.
Соговорниците посочиле дека напредокот на секоја земја кандидатка треба да зависи од индивидуалните постигнувања и исполнувањето на преземените обврски, односно процесот да се заснова на принципот на заслуги.
Во разговорите било нагласено и дека билатералните прашања не треба да го попречуваат или определуваат процесот на европска интеграција, туку во центарот треба да останат европските стандарди, реформите и исполнувањето на условите за членство.
Била поздравена и поддршката од Ирска во периодот на нејзиното тековно претседавање со Советот на Европската Унија, оценета како придонес за кредибилен, предвидлив и заснован на заслуги процес на проширување.
На средбата било разговарано и за продолжување на парламентарната соработка и размената на искуства, особено во областа на европските интеграции, реформите и јакнењето на парламентарниот надзор врз исполнувањето на европските стандарди.
