Министерот за правда Јетон Шасивари денеска се сретна со директорот на Регионалната антикорупциска иницијатива (РАИ), Алберт Хани, при што беше потврдена заедничката определба за продлабочување на соработката во борбата против корупцијата и унапредување на реформските процеси.
На средбата беше истакнато значењето на активното учество на Македонија во работата на РАИ, како и потребата од понатамошно јакнење на регионалната соработка во спречувањето на корупцијата.
Шасивари ја потврди поддршката на Министерството за правда за претстојните активности на РАИ, меѓу кои и Регионалната конференција за проценка на ризиците од корупција и проверка на законодавството од аспект на корупцијата во безбедносниот сектор, што ќе се одржи во Скопје. Тој најави и учество на Министерскиот придружен настан за борба против корупцијата во рамките на Берлинскиот процес, кој ќе се одржи во Тирана.
Во разговорите беше нагласена и посветеноста на Министерството за правда на реформите поврзани со владеењето на правото, усогласувањето на националното законодавство со европските стандарди и исполнувањето на обврските од Поглавјата 23 и 24 во процесот на пристапување кон Европската Унија.
Двете страни ја потврдија подготвеноста за продолжување на соработката преку заеднички иницијативи и проекти насочени кон јакнење на институционалните капацитети, интегритетот и доброто владеење.
На крајот од средбата, директорот на РАИ, Алберт Хани, му честиташе на Шасивари за именувањето на функцијата министер за правда и изрази уверување дека партнерството меѓу Министерството за правда и Регионалната антикорупциска иницијатива ќе продолжи да се развива.
