Министерот за правда Јетон Шасивари денеска се сретна со вршителката на должноста шеф на Мисијата во Амбасадата на Соединетите Американски Држави, Никол Варнс, при што беше потврдена продолжената соработка меѓу Министерството за правда и САД во спроведувањето на реформите во правосудството.
На средбата се разговараше за клучните приоритети на Министерството, меѓу кои реформите во правосудството, владеењето на правото, дигитализацијата на правосудниот систем, законодавната агенда и борбата против корупцијата. Шасивари побара и натамошна размена на искуства и експертска поддршка од САД во областа на кривичното законодавство.
Тој изрази благодарност за досегашната американска поддршка на реформските процеси, истакнувајќи дека таа придонесува за зајакнување на институционалните капацитети, особено во борбата против транснационалниот организиран криминал и за унапредување на соработката со меѓународните партнери.
Во фокусот на разговорите беше и реформата на кривичното законодавство, при што беше посочено дека започнала реализацијата на проектот „Поддршка за спроведување на Националната стратегија за дроги во Република Северна Македонија“, финансиран од Бирото за меѓународни прашања поврзани со наркотиците и спроведувањето на законите (INL) при Стејт департментот на САД.
Соговорниците ја потврдија заедничката определба за понатамошно продлабочување на партнерството преку нови заеднички проекти, експертска поддршка и размена на искуства во областите од заеднички интерес.
