Трагедијата во Кочани претставува тешка лекција и сериозен аларм за државата, оцени портпаролката на Владата и член на Извршниот комитет на ВМРО-ДПМНЕ, Марија Митева, во гостување во емисијата „Топ тема“ на Телма, посочувајќи дека системот предолго време функционирал во состојба на институционален застој.
Таа нагласи дека суштината не е само во „разбудувањето“ на системот, туку во неговото стабилно и континуирано функционирање, независно од политичките промени.
„Кочани беше една тешка лекција за сите и силен аларм за државата, затоа што системот предолго време беше во длабок сон. Но, поважно е кога ќе го изградите системот, тој да продолжи да функционира и да не се руши со секоја промена на власта, туку да работи врз принципи кои ќе се почитуваат доследно“, изјави Митева.
Според неа, по трагедијата биле спроведени засилени инспекциски контроли и направена сеопфатна анализа на институционалните слабости, со цел да се намали ризикот од злоупотреби.
Митева посочи дека во текот на 2025 година биле реализирани околу 4.000 инспекциски надзори, издадени повеќе од 1.700 прекршочни платни налози и донесени 162 решенија за привремена забрана за вршење дејност, додека бројот на активни лиценци бил сведен на седум.
„Контролата е реална кога бројките го потврдуваат тоа. Колку повеќе надзори и контроли има, толку е помала веројатноста за злоупотреби“, истакна таа.
Дополнително, нагласи дека институциите воспоставиле меѓуресорска координација, особено во делот на утврдување на надлежностите, што, како што рече, било едно од клучните прашања отворени по трагедијата.
„Не станува збор за реакција само по трагедијата, туку за континуиран пристап во изминатите 365 дена, кој ќе продолжи и понатаму“, додаде Митева.
